Uf em ufstigende ascht…
…würdi mi zuestand momentan beschribe.
i ha mi entscheide, für einisch uf berndütsch ds schribe. erschtens, damit o die wo im Änglische nid so deheime se öppis verstöh und zwöitens, dass is nid verlehre. i triffe zwar geng wieder mal e schwizer a, aber de losi mir aube selber zue und es tönt ganz komisch.
o am telefon muess i mi aube wieder chli dra gwöhne, i rede hie geng nume englisch oder dütsch mit de 2 steffis.
uf em usfstigende ascht, wüu i doch grad e chli es tief ha gha ir letschti. es het agfange mit dere angina, wo de direkt ine impetigo übergange isch. das isch sone huterchrankig, eigentlech e chinderchrankheit, und die hani wahrschinlech ir schuel ufgläse. i ha de ganz lang antibotika müesse näh. gäge dä hässlech usschlag hani itz ungerdesse e bome ladig cortison übercho u itz geits wieder chli. gseht aber also gar nid chic us. i bi grad froh gsi, hani nid so zyt für e strand im moment.
mit de volunteers isch s es uf und ab. die itz si also scho relativ müehsam. eine isch bsunders nervig, i bi de so frooooh, wenn de nächschte mäntig mal gschobe isch.
es geit itz no gueti 3 wuche bis zu de ferie. de hei mir 1 wuche schuelferie und de chunnt de die nächschti wuche volunteers.
d steffis gö de denn scho hei, das wird für mi sehr truurig si…sie si ja hie mini fründinne und mir ungernähme geng chli öppis zäme.
letschts wuchenend hei mir e riiiese fete gha, d mel, eini vo de receptionischtinne geit wieder hei…und drum hei mir sie verabschiedet. isch es bunts fescht gsi und het e vorgschmack uf e summer gä, wo itz würklech um en egge chunnt. es isch länger hell, d lütt si meh dusse und d sunne hett chraft…isch so schön…i freue mi!
I ha mi “vertrag” hie übrigens verlängeret und chume drum tatsächlech i genuss vom summer. blibe sicher bis zum endi vom jahr hie, mit mire aweseheit bim zibelemärit und chlousetag isch also nid ds rechne.
wiehnachte und neujahr weiss i no nid, mal luege. fänds aber ganz cool, das mal im summer ds fiire. muess itz de mi flug verschiebe, damit i ds visum cha verlängere. i wirde itz sogar zahlt, bi also ke richtige volunteer me…muess gloub dr titel vo mim blog ändere :). isch cool, aber riich wirdi also nid drby. im gegeteil, im endeffekt legi immer no druf- eifach chli weniger.
mini ferieplän si plötzlech o ganz konkret worde. mir schwebt uganda vor. dr raphi, mi fründ us israel, isch fürne monat dert und schaffet imne HIV projekt. drum hani churzum gfunde, i chönnt ja mal dert ufe ga güggsle…itz bini grad am usefinde, ob i mir das ch leischte…aber i gloub scho :)…es muess eifach klappe, wüus ja so schön muess si dert obe. und dr raphi hani o scho ewigs nümme gseh…isch öppe wieder eninisch zyt. ds letscht mal hei mir üs in barcelona gseh.
so, itze verlani das büro de grad mal und säge uf wiederluege. merci, dass dir immer smslet, mailet und msnlet und skypet und facebooket. was wär d welt hützutag ohni ds internet…? viellecht geheimnisvoller, aber i wär viel witter wäg vo deheime. i vermisse euch alli, mini familie und fründe! falls dir no keni plän für d herbschtferie heit…hie wirds übrigens grad summerlech warm und dr strand isch 2 min vo mim huus…welköm!
hie no e ufruef a alli mit skype: mi skype name isch sonjitah…wär het söu sech doch mal melde, und wer nid söu skype abelade und sech denn melde!
herzlechi grüess vor angere sitte vom äquator
sonja
Tags: Travel
sonjahofstetter
Leave a Reply